Roma ikki nafar asosiy futbolchisi bilan shartnomani uzaytirdi

Italiyaning "Roma" futbol klubi o‘z tarkibidagi ikki muhim o‘yinchi bilan shartnomani uzaytirdi. Bu haqda Euro-football.ru xabar berdi.

Klub matbuot xizmatining xabar berishicha, markaziy yarim himoyachi Brayan Kristante va himoyachi Janluka Manchini bilan yangi mehnat kelishuvlari imzolangan. Yarim himoyachi Brayan Kristante rimliklar safida 2018-yildan buyon to‘p surib kelmoqda.

Yangi shartnomaga ko‘ra, 31 yoshli futbolchi 2028-yilning yoziga qadar "Roma" sharafini himoya qiladi. U shu vaqtga qadar jamoa tarkibida 364 ta o‘yinda maydonga tushib, 21 ta gol urgan va 23 ta golli uzatmani amalga oshirgan.

Shuningdek, 30 yoshli himoyachi Janluka Manchini ham klub bilan hamkorlikni davom ettiradigan bo‘ldi. U 2020-yildan beri jamoa tarkibida o‘ynab kelmoqda.

Manchini yangi kelishuvga binoan yana uch mavsum davomida Rim klubi safida qoladi. Himoyachi "Roma" libosida jami 319 ta uchrashuvda ishtirok etib, 23 ta gol va 13 ta assist muallifiga aylangan.

Eslatib o‘tamiz, o‘tgan mavsum yakunlariga ko‘ra, "Roma" Italiya A Seriyasida uchinchi o‘rinni egallab, yuqori natija qayd etgan edi. Klub rahbariyati ushbu tajribali futbolchilar bilan shartnomani uzaytirish orqali kelgusi mavsumlar uchun tarkib barqarorligini ta’minlashni maqsad qilgan.