Italiyalik tajribali mutaxassis Mauritsio Sarri A Seriyaning bir qator klublari tomonidan asosiy nomzod sifatida ko'rilmoqda. Bu haqda Euro-football.ru xabar berdi.
Ma'lum qilinishicha, murabbiyga «Fiorentina» jiddiy qiziqish bildirmoqda. Shuningdek, «Napoli» rahbariyati ham Sarrini jamoaga qaytarish variantini ko'rib chiqmoqda.
Bu holat neapolliklarning amaldagi ustozi Antonio Konte o'z lavozimini tark etishga qaror qilgan taqdirda yuz berishi mumkin. Mauritsio Sarri muqaddam «Napoli»da muvaffaqiyatli faoliyat yuritgan bo'lsa-da, ayni damda «Fiorentina»dagi qiziqish ancha yuqori ekani aytilmoqda.
Florensiya klubi rahbariyati Paolo Vanoli bilan uzoq muddatli loyiha qurish niyatida emas. Garchi Vanoli A Seriyaning ikkinchi davrasida yomon natija ko'rsatmagan bo'lsa-da, «binafsharanglilar» tajribaliroq murabbiyga tayanmoqchi.
Shuningdek, nomzodlar orasida joriy mavsumda o'zini ko'rsatgan Fabio Grosso ham bor. Biroq TuttoMercatoWeb nashri xabariga ko'ra, «Fiorentina» uchun Sarri asosiy ustuvor vazifa bo'lib turibdi.
Mauritsio Sarrining Italiya chempionatidagi katta tajribasi va o'yin uslubi jamoaning kelgusi strategiyasi uchun mos kelishi kutilmoqda. Hozirda tomonlar o'rtasidagi muzokaralar jarayoni diqqat markazida bo'lib turibdi.
