Janubiy afrikalik yosh futbolchi Jeyden Adams vafot etdi

11 iyul kuni Janubiy Afrika futbol olami og‘ir judolikka uchradi. Bu haqda Zamin.uz xabar berdi.

Mamlakatning taniqli klublaridan biri bo‘lgan Mamelodi Sandauns jamoasi hamda milliy terma jamoa yarim himoyachisi Jeyden Adams 25 yoshida hayotdan ko‘z yumdi. Ushbu qayg‘uli xabar haqida dastlab Soccer Laduma nashri ma’lumot tarqatdi.

Hozirgi vaqtga qadar futbolchining vafot etishiga nima sabab bo‘lgani borasida rasmiy idoralar tomonidan aniq bayonot berilmadi. Voqea tafsilotlari bo‘yicha turli taxminlar ilgari surilmoqda.

Ayrim ommaviy axborot vositalari dastlabki ma’lumotlarga tayanib, sportchi o‘z joniga qasd qilgan bo‘lishi mumkinligini ta’kidlamoqda. Biroq bu ma’lumotlar hozircha hech qanday rasmiy manba tomonidan tasdiqlangani yo‘q.

Jamoatchilik va futbol muxlislari tergov jarayonining yakunini hamda rasmiy xulosalarni kutishmoqda. Mazkur hodisa Janubiy Afrika sport jamoatchiligida katta rezonans keltirib chiqardi va ko‘plab muxlislar hamda hamkasblar o‘z hamdardligini bildirmoqda.

Marhumning oila a’zolari va yaqinlariga chuqur ta’ziya izhor etamiz.