Aleksander Cheferin: «VAR faqat yaqqol vaziyatlarda aralashishi kerak» UEFA prezidenti Aleksander Cheferin hakamlar, xususan, VAR tizimi tomonidan penalti belgilash mezonlari tushunarsiz bo'lib qolayotganini tanqid qildi. Bu haqda Euro-football.ru xabar berdi.
Tashkilot rahbarining fikricha, hozirgi kunda muxlislar to'pning qo'lga tegishi bilan bog'liq qaysi holatlar o'n bir metrlik jarima zarbasi bilan jazolanishi borasida chalkashliklarga duch kelmoqda. Cheferin qo'l bilan o'yinning qasddan qilinganini aniqlash murakkab ekanini ta'kidladi.
«Buni qanday tushunish mumkin? Axir siz psixiatr emassiz-ku!
VAR hakamlari faqat yaqqol va shubhasiz vaziyatlarga aralashishi lozim», — deya uning so'zlarini keltirmoqda Sportklub nashri. Bundan tashqari, UEFA rahbari o'yin davomidagi uzoq davom etadigan tanaffuslardan norozi ekanini bildirdi.
Uning hisob-kitoblariga ko'ra, Angliya yoki Ispaniya chempionatlarida hakamlarning qaror qabul qilishi 10-15 daqiqagacha vaqt olmoqda. Cheferinning so'zlariga ko'ra, bunday holatlar futbol protokollarida dastlab nazarda tutilmagan va o'yin sur'atiga salbiy ta'sir ko'rsatmoqda.
