O‘zbekiston delegatsiyasi Vena shahrida o‘tgan xalqaro anjumanda ma’ruza qildi

Avstriya poytaxti Vena shahri bugun xalqaro miqyosdagi muhim voqeaga mezbonlik qilmoqda. Bu haqda Zamin.uz xabar berdi.

BMTning Jinoyatchilikning oldini olish va jinoiy odil sudlov komissiyasining 35-sessiyasi o‘z ishini boshladi. Ushbu nufuzli anjumanda 175 ta mamlakatdan 1,5 mingdan ortiq davlat arboblari, vazirlar va xalqaro ekspertlar jam bo‘ldi.

Mazkur sammit O‘zbekiston diplomatiyasi va davlat siyosatida yangi bosqichni boshlab bergan tarixiy voqea sifatida baholanmoqda. O‘zbekiston delegatsiyasiga Prezident Administratsiyasi rahbari Saida Mirziyoyeva boshchilik qilmoqda.

Joriy yilning aprel oyida O‘zbekiston mazkur komissiyaga ilk bor a’zo bo‘lgan edi. Vena anjumanining ochilish qismida O‘zbekiston vakillarining Milliy ma’ruza bilan birinchi bo‘lib minbarga taklif etilishi mamlakatimizning xalqaro maydondagi nufuzi ortib borayotganidan dalolat beradi.

Bu e’tirof Prezident Shavkat Mirziyoyev tomonidan amalga oshirilayotgan islohotlar va xalqchil siyosatning natijasi sifatida qabul qilinmoqda. Saida Mirziyoyeva o‘z nutqida O‘zbekistondagi sud-huquq tizimini takomillashtirish, xotin-qizlar va bolalar huquqlarini himoya qilish hamda jinoyatchilikning oldini olish borasidagi yutuqlarga alohida urg‘u berdi.

U o‘z chiqishida kiberjinoyatchilik, korrupsiya va oilaviy zo‘ravonlik kabi global tahdidlarga qarshi kurashishda xalqaro hamkorlik, tajriba almashish va ochiq muloqot muhim ahamiyat kasb etishini ta’kidladi. O‘zbekiston delegatsiyasi tomonidan ilgari surilgan tashabbuslar jahon hamjamiyati tomonidan qo‘llab-quvvatlanib, mamlakatimizning inson huquqlarini ta’minlash borasidagi qat’iy pozitsiyasi yana bir bor o‘z tasdig‘ini topdi.