O‘zbekiston Respublikasi Energetika vazirligi joriy kuz-qish mavsumida elektr energiyasi ta’minotida rejadan tashqari uzilishlar yuz bermasligi yuzasidan rasmiy bayonot berdi. Bu haqda Zamin.uz xabar berdi.
Vazirlik vakillarining qayd etishicha, mamlakat bo‘ylab elektr tarmoqlari va infratuzilma obyektlari qishki mavsum talablariga to‘liq moslashtirilgan. Tizim barqarorligini ta’minlash maqsadida barcha zaruriy chora-tadbirlar amalga oshirilgan.
Shu bilan birga, tarmoqlardagi eskirgan uskunalarni modernizatsiya qilish hamda rejali ta’mirlash ishlarini olib borish jarayonida ayrim hududlarda elektr energiyasi ta’minoti qisqa muddatli va vaqtincha to‘xtatilishi ehtimoli mavjud. Bunday texnik profilaktika ishlari tarmoqlardagi avariyaviy holatlarning oldini olishga xizmat qiladi.
Energetika vazirligi ushbu jarayonlar haqida iste’molchilarni oldindan xabardor qilib borishni rejalashtirgan. Aholi va iqtisodiyot tarmoqlarini barqaror energiya bilan ta’minlash vazirlikning ustuvor vazifasi bo‘lib qolmoqda.
Mutasaddilar energiya tizimidagi nosozliklarni tezkorlik bilan bartaraf etish uchun barcha zarur texnik va inson resurslari safarbar etilganini ma’lum qilgan.
Izohlar
0