Yosh xonanda Dilnoz Hakimova ishtirok etgan YouTube loyihalaridan birida shaxsiy hayoti, turmush o'rtog'i bilan munosabatlari hamda uydagi tartib-qoidalar haqida samimiy fikrlarini bildirdi.
“Oila hayotimni og'irlashtirmadi”
Xonandaning so'zlariga ko'ra, turmush qurgandan keyin hayoti keskin o'zgarmagan. U oila qurish ortidan katta og'irlik sezmaganini aytadi. Chunki ular to'ydan so'ng alohida uyga ko'chib o'tgani sababli kundalik ro'zg'or tashvishlari unga jiddiy yuk bo'lmagan.
Uning ta'kidlashicha, hozir asosan turmush o'rtog'i uchun ovqat tayyorlash bilan cheklanadi, og'ir uy ishlari esa majburiyat emas. Shu bilan birga, dam olish kunlarida qaynona-qaynotasi xonadoniga borib, oilaviy uchrashuvlar o'tkazish odatga aylangan.
“Ayrim cheklovlar bor”
Dilnoz Hakimova tadbir va uchrashuvlarda ko'proq ayollar va bolalar bilan suratga tushishini, erkaklar bilan rasmga tushmasligini turmush o'rtog'i istagi bilan bog'liq ekanini bildirdi.
Shuningdek, u dugonalari bilan restoran yoki kafega borish ham cheklanganini aytdi. Xonandaning ta'kidlashicha, bunday qarorlar tashqaridan qattiq nazoratdek ko'rinishi mumkin, ammo u buni oilaviy kelishuv sifatida qabul qiladi.
Uning aytishicha, avvalroq do'stlar bilan bemalol vaqt o'tkazish, kafega borish odatiy holat bo'lgan. Hozir esa ko'proq uy sharoitida uchrashishga to'g'ri kelmoqda.
“Ba'zilar buni qattiq nazorat deb o'ylashi mumkin”
Xonanda kliplarining ayrim sahnalarida ham ishtirok etmasligini, bu ham turmush o'rtog'ining qarori ekanini bildirdi. Uningcha, tashqi kuzatuvchilar buni qattiq nazorat sifatida qabul qilishi mumkin, ammo u oilasini hurmat qiladi.
Sahna va obraz haqida fikr
Dilnoz Hakimova ijodda ayolning nafosati va latofati muhim ekanini ta'kidladi. Uning fikricha, sahnada tabiiylik va nazokatni saqlash muxlislar uchun eng ta'sirli jihatlardan biridir.
U har doim o'z chegarasini saqlashga harakat qilishini, har qanday obrazda ham nafosatni yo'qotmaslik mumkinligini aytadi. Xonanda uchun eng muhimi — insonning ichki xotirjamligi va baxti.
Izohlar
0