Bugun, 2 oktyabr kuni Toshkent shahrining Yangihayot tumanida joylashgan va ayni paytda qurilish ishlari olib borilayotgan masjid binosida yong‘in yuzaga keldi. Bu haqda Zamin.uz xabar berdi.
Favqulodda vaziyatlar bosh boshqarmasi tomonidan taqdim etilgan dastlabki ma’lumotlarga ko‘ra, olov masjidning gumbaz qismida paydo bo‘lgan. Voqea joyiga zudlik bilan qutqaruv xizmati xodimlari jalb etilgan.
Toshkent shahar Favqulodda vaziyatlar bosh boshqarmasi xabariga ko‘ra, hodisa haqidagi ilk signal soat 08:47 da kelib tushgan. Unda Yangihayot tumani, Sergeli 4-dahasida qad rostlayotgan masjid binosining gumbaz qismidan tutun chiqayotgani ma’lum qilingan.
Hozirgi vaqtda yong‘inning kelib chiqish sabablari va uning ko‘lami bo‘yicha surishtiruv ishlari olib borilmoqda. Rasmiy idoralar yong‘in natijasida jabrlanganlar yoki halok bo‘lganlar haqida hozircha ma’lumot bermadi.
Voqea joyida o‘t o‘chiruvchilar tomonidan zarur choralar ko‘rilib, vaziyat nazoratga olingan. Mutaxassislar tomonidan yong‘in xavfsizligi qoidalari hamda qurilish jarayonidagi texnik talablar qayta ko‘rib chiqilishi kutilmoqda.
Izohlar
0