O'zbekistonda xorijiy turoperatorlar uchun keng ko'lamli info tur o'tkazildi
17-apreldan 23-aprelga qadar "Destination Karakalpakstan 2026" forumi doirasida Toshkent shahri, Xorazm viloyati va Qoraqalpog'iston Respublikasi bo'ylab maxsus info tur tashkil etildi. Bu haqda Zamin.uz xabar berdi. Tadbir mamlakatning sayyohlik salohiyatini xalqaro darajada targ'ib qilish va yangi turistik yo'nalishlarni ommalashtirishga qaratilgan. Loyiha doirasida Yevropa va Osiyoning 20 ga yaqin davlatidan, jumladan, Fransiya, Italiya, Norvegiya, Shveysariya, Belgiya, Turkiya, Rossiya, Xitoy va Qozog'iston kabi mamlakatlardan kelgan yetakchi turoperatorlar O'zbekistonning imkoniyatlari bilan tanishdi.
Mutaxassislar uchun tashkil etilgan ushbu safar xorijiy hamkorlar bilan aloqalarni mustahkamlash va kelgusida sohaga investitsiyalarni jalb qilish uchun asos bo'lib xizmat qiladi. Sayohat dasturi poytaxt Toshkentning zamonaviy infratuzilmasi va yangi turistik ob'ektlarini ko'zdan kechirishdan boshlandi.
Shundan so'ng delegatsiya a'zolari Xorazm viloyatiga tashrif buyurib, Xiva shahridagi "Ichan Qal'a" majmuasi va Nurullaboy saroyi kabi tarixiy yodgorliklar bilan tanishdi. Mehmonlar mintaqaning me'moriy merosi va qadimiy shaharsozlik an'analarini yuqori baholadi.
Info tur Qoraqalpog'iston Respublikasida yakunlandi. Ishtirokchilar Ayoz qal'a va Chilpiq qal'a obidalarini ziyorat qilib, Orolbo'yi hududining o'ziga xos tabiati va ekoturizm salohiyatini o'rgandi.
Ayniqsa, cho'l hududidagi o'tov lagerlari, milliy an'analar va mahalliy aholining mehmondo'stligi xorijlik mutaxassislarda katta qiziqish uyg'otdi. Mazkur tashabbus O'zbekistonning jahon sayyohlik xaritasidagi o'rnini mustahkamlashga qaratilgan muhim qadam bo'ldi.
