Xitoyning yangi videokartasi savdoga chiqqanidan so‘ng tezda sotildi

Xitoyning texnologiya bozorida yangi sahifa ochgan Lisuan LX 7G100 videokartasi foydalanuvchilar va ekspertlar e’tiborini tortdi. Bu haqda Zamin.uz xabar berdi.

Lisuan Technology kompaniyasi tomonidan taqdim etilgan ushbu qurilma mamlakatda ishlab chiqarilgan va Microsoft WHQL sertifikatiga ega bo‘lgan ilk o‘yin videokartasi sifatida qayd etildi. Ixbt.com manbasiga tayanib aytish mumkinki, sotuvlar boshlanganiga bor-yo‘g‘i ikki sutka to‘lgan bo‘lishiga qaramay, buyurtmalar soni 30 mingdan oshib ketdi.

Ishlab chiqaruvchi xaridorlar uchun maxsus grafik drayverlar hamda 40 ta zamonaviy o‘yin uchun optimallashtirish bo‘yicha qo‘llanmani ham taqdim etgan. Lisuan LX 7G100 qurilmasining ahamiyati shundaki, u NVIDIA, AMD hamda Intel kabi gigant kompaniyalar hukmronlik qilayotgan bozorda xalqaro WHQL sertifikatini qo‘lga kiritgan va DirectX 12 texnologiyasini apparat darajasida to‘liq qo‘llab-quvvatlaydigan ilk xitoylik mahsulot hisoblanadi.

Texnik ko‘rsatkichlarga nazar tashlaydigan bo‘lsak, qurilma 6 nanometrli GPU negizida ishlab chiqilgan bo‘lib, 12 GB hajmdagi GDDR6 xotirasi bilan jihozlangan. Shuningdek, u Vulkan 1.3, OpenGL 4.6 va OpenCL 3.0 API interfeyslarini qo‘llab-quvvatlaydi.

Videokartaning quvvat iste’moli 225 W ga teng bo‘lib, u to‘rtta DisplayPort 1.4a chiqish portiga ega. Dastlabki davrlarda ushbu model GeForce RTX 4060 analogi sifatida e’lon qilingan bo‘lsa-da, test jarayonlari uning unumdorligi GeForce RTX 3060 darajasidan ham pastroq ekanligini ko‘rsatdi.

Shunga qaramay, 500 dollarlik narx va texnik imkoniyatlar xitoylik iste’molchilar uchun jozibador bo‘lib chiqdi.