Xitoylik mustaqil ixtirochi Song Sin’yuy kino olamidagi fantastik g‘oyalarni hayotga tatbiq etish maqsadida o‘ziga xos uchuvchi skeytbord yaratdi. Bu haqda Zamin.uz xabar berdi.
Mazkur qurilmani loyihalashda muallif mashhur O‘rgimchak odam filmidagi Yashil Goblin qahramoni foydalangan uchar vositadan ilhomlangan. Ixtirochi ushbu murakkab texnikani ishlab chiqish jarayonida zamonaviy sun’iy intellekt imkoniyatlaridan unumli foydalangan.
Xalqaro axborot agentliklarining xabar berishicha, loyiha ustida ishlash davomida muayyan texnik qiyinchiliklar yuzaga kelgan. Dastlabki sinov bosqichlarida ixtirochi qurilmaga beshta reaktiv dvigatel o‘rnatib, uni havoga ko‘tarishga uringan.
Biroq dvigatellarning o‘zaro uyg‘unlashuvi va umumiy quvvatni boshqarish jarayonidagi muammolar sababli qurilmaning barqaror ishlashiga erishish murakkab kechgan. Hozirgi kunda muhandis ushbu kamchiliklarni bartaraf etish va parvoz xavfsizligini ta’minlash borasida tadqiqotlarni davom ettirmoqda.
Ushbu loyiha shaxsiy aviatsiya transporti yo‘nalishidagi qiziqarli urinishlardan biri sifatida e’tirof etilmoqda.
Izohlar
0