Toshkent viloyati bank tizimida mas’ul lavozimda faoliyat yuritgan shaxs yirik miqdordagi mablag‘ni tovlamachilik yo‘li bilan qo‘lga kiritishga uringanlikda gumonlanib, huquqni muhofaza qiluvchi organlar tomonidan qo‘lga olindi. Bu haqda Zamin.uz xabar berdi.
Ma’lumotlarga ko‘ra, mazkur mansabdor shaxs Quyichirchiq tumanida joylashgan, umumiy maydoni 20 gektardan ortiq bo‘lgan yer uchastkasini rasmiylashtirib berish evaziga xaridordan millionlab dollar talab qilgan. Qonunga xilof ushbu harakatlarning oldini olish maqsadida Davlat xavfsizlik xizmati hamda Bosh prokuratura huzuridagi Iqtisodiy jinoyatlarga qarshi kurashish departamenti xodimlari hamkorligida maxsus tezkor tadbir tashkil etildi.
O‘tkazilgan tadbir davomida gumonlanuvchi noqonuniy talab qilingan pul mablag‘larining bir qismini olayotgan vaqtda ashyoviy dalillar bilan ushlangan. Ayni paytda mazkur holat yuzasidan tegishli tartibda jinoyat ishi qo‘zg‘atilib, tergov harakatlari olib borilmoqda.
Huquq-tartibot idoralari vakillari tomonidan mazkur jarayon bo‘yicha qo‘shimcha ma’lumotlar tergov yakuniga ko‘ra e’lon qilinishi kutilmoqda.
Izohlar
0