Toshkent viloyatida 63 ming dollar pora so'ragan mansabdor ushlandi
Toshkent viloyatida favqulodda vaziyatlar tizimida faoliyat yurituvchi mas'ul shaxs yirik miqdordagi pora bilan qo'lga olindi. Bu haqda Zamin.uz xabar berdi. Aniqlanishicha, ushbu mansabdor tumandagi qurilish loyihalarini hal qilib berish evaziga tadbirkordan moddiy manfaatdorlik talab qilgan. Xususan, u qiymati 5,04 mlrd so'mlik qurilish ishlarini o'z xizmat vakolatlari va aloqalari orqali olib berishni va'da qilib, "MChJ" rahbaridan 63 ming AQSh dollari so'ragan.
Tergov hujjatlariga ko'ra, gumonlanuvchi 2026 yil mart va aprel oylarida so'ralgan mablag'ning 24 ming dollarini qabul qilib olgan. Shunga qaramay, u pulning qolgan qismini berishni talab qilishda davom etgan.
Davlat xavfsizlik xizmati hamda Bosh prokuratura huzuridagi Departament xodimlari tomonidan o'tkazilgan tezkor tadbir davomida mansabdor shaxs navbatdagi 25 ming dollarni olayotgan vaqtida ashyoviy dalillar bilan ushlandi. Mazkur holat yuzasidan tegishli moddalar bilan jinoyat ishi qo'zg'atildi.
Hozirda gumonlanuvchiga nisbatan qamoqqa olish ehtiyot chorasi qo'llangan bo'lib, tergov harakatlari olib borilmoqda.
