Tokio universiteti olimlari qayta foydalaniladigan kosmik kemalarning atmosferaga kirish jarayonida duch keladigan o‘ta yuqori harorat muammosini hal etishga qaratilgan yangi texnologiyani muvaffaqiyatli sinovdan o‘tkazdi. Bu haqda Zamin.uz xabar berdi.
Ixbt.com nashri xabariga ko‘ra, tadqiqotchilar guruhi an’anaviy og‘ir issiqlik izolyatsiyasi qatlamlaridan voz kechish imkonini beruvchi magnitogidrodinamik tormozlanish tizimini ishlab chiqdi. Ushbu yondashuv kosmik apparatlar konstruksiyasini yengillashtirish va ularning samaradorligini oshirishda muhim qadam hisoblanadi.
Laboratoriya sharoitida o‘tkazilgan tajribalar davomida mutaxassislar maxsus eksperimental qurilma yordamida plazma oqimini boshqarish hamda magnit maydon ta’sirida tormozlanish jarayonini amalda kuzatishga muvaffaq bo‘lishdi. Mazkur texnologiya atmosferaga kirish vaqtida hosil bo‘ladigan issiqlik yuklamasini samarali tarzda kamaytirib, apparat korpusini himoya qilishning yangi usulini taqdim etadi.
Olimlarning fikricha, mazkur yangilik kelgusida kosmik parvozlarning tannarxini pasaytirish va qayta tiklanadigan kosmik transport vositalarining ishonchliligini ta’minlashda muhim o‘rin tutadi. Tadqiqot ishlari hozirgi bosqichda texnik parametrlarni optimallashtirish va tizimni keng ko‘lamli amaliyotga tatbiq etishga qaratilgan.
Izohlar
0