O‘zbekistonning Telegram messenjeri hududida fuqarolarning shaxsiy ma’lumotlari va mablag‘larini qo‘lga kiritishni maqsad qilgan navbatdagi firibgarlik sxemasi aniqlandi. Bu haqda Zamin.uz xabar berdi.
Jinoyatchilar bu gal aholini chalg‘itish uchun davlat nomidan go‘yoki yangi ijtimoiy kompensatsiya dasturi joriy etilgani haqidagi yolg‘on ma’lumotlardan foydalanmoqda. Tarqatilayotgan soxta xabarlarda har bir fuqaroga bir necha million so‘m miqdorida pul to‘lovlari va’da qilinib, foydalanuvchilar shubhali havolalarga o‘tishga undalmoqda.
Mutaxassislarning qayd etishicha, ushbu firibgarlik usuli odamlarning ijtimoiy himoyaga bo‘lgan ehtiyojidan foydalanishga qaratilgan. Jinoyatchilar ishonch qozonish uchun rasmiy idoralarning uslubiga o‘xshash vizual materiallar va soxta havolalarni qo‘llashmoqda.
Ushbu havola orqali kirgan foydalanuvchilardan bank karta ma’lumotlari yoki shaxsni tasdiqlovchi maxfiy kodlar so‘ralishi mumkin. Bu esa shaxsiy hisob raqamlarning nazoratsiz qolishiga va mablag‘larning o‘g‘irlanishiga olib keladi.
Huquqni muhofaza qiluvchi organlar fuqarolarni bunday turdagi xabarlarga ishonmaslikka, rasmiy tasdiqlanmagan manbalar orqali shaxsiy ma’lumotlarni oshkor qilmaslikka va shubhali havolalarni ochmaslikka chaqirmoqda. Har qanday ijtimoiy to‘lovlar faqat rasmiy davlat resurslari orqali amalga oshirilishini yodda tutish lozim.
Izohlar
0