Majburiy ijro byurosining Sirdaryo viloyati boshqarmasi qidiruv bo‘limi xodimlari zimmasidagi ijro hujjatlarini ta’minlash borasida samarali choralar ko‘rmoqda. Bu haqda Zamin.uz xabar berdi.
Mazkur yo‘nalishda olib borilgan tizimli va tezkor-qidiruv tadbirlari natijasida qarzdor fuqarolarga tegishli bo‘lgan, biroq uzoq vaqtdan buyon yashirinib kelingan mol-mulklarni aniqlash ishlari o‘z samarasini bermoqda. Xususan, yaqinda amalga oshirilgan navbatdagi tadbir davomida 91 ta ijro hujjati bo‘yicha majburiyatlarini bajarmay kelayotgan shaxsga tegishli Jentra rusumli avtomashina topildi.
Qidiruvda bo‘lgan ushbu transport vositasi byuro xodimlari tomonidan belgilangan tartib va qonuniy asoslarga ko‘ra ushlandi. Hozirgi vaqtda aniqlangan avtomobil jarima maydoniga vaqtincha saqlash uchun joylashtirilgan.
Mazkur jarayon ijro hujjatlarida ko‘rsatilgan qarzdorliklarni undirish va sud qarorlarining so‘zsiz ijrosini ta’minlash maqsadida davom ettirilmoqda. Byuro vakillari tomonidan mazkur yo‘nalishdagi nazorat tadbirlari kelgusida ham qat’iy davom ettirilishi ma’lum qilindi.
Izohlar
0