Samsung Xitoyda maishiy texnika savdosini to'xtatishi mumkin
Janubiy Koreyaning Samsung kompaniyasi 2024 yil yakuniga qadar Xitoy bozorida televizor va maishiy texnika savdosini butunlay to'xtatishni rejalashtirmoqda. Bu haqda Zamin.uz xabar berdi. Nikkei nashri o'z manbalariga tayanib ma'lum qilishicha, kompaniya rahbariyati ushbu masala bo'yicha yakuniy qarorni aprel oyi oxirida qabul qiladi. Mazkur o'zgarish brendning Xitoydan butunlay chiqib ketishini anglatmaydi.
Kompaniya mamlakat hududidagi muzlatkich, kir yuvish mashinasi va konditsioner ishlab chiqaruvchi zavodlari faoliyatini saqlab qoladi. Biroq ushbu quvvatlar endilikda ichki bozor ehtiyojlari uchun emas, balki faqat boshqa davlatlarga eksport qilish uchun yo'naltiriladi.
Ekspertlar tahliliga ko'ra, bunday qadamga Xitoy bozoridagi keskin raqobat sabab bo'lgan. Xiaomi, TCL va boshqa mahalliy brendlar mahsulot sifatini oshirib, ancha arzon narxlarni taklif qilayotgani natijasida Samsung mahsulotlarining raqobatbardoshligi pasayib ketdi.
Hozircha Samsung vakillari global biznes tuzilmasi muntazam ravishda qayta ko'rib chiqilishini ta'kidlash bilan cheklanmoqda. Kompaniya Xitoydagi faoliyatni tarkibiy o'zgartirish bo'yicha hali rasmiy to'xtamga kelinmaganini bildirdi.
Ushbu vaziyat yuzasidan qo'shimcha ma'lumotlarni Ixbt.com nashri ham tasdiqlagan.
