Rossiyada tibbiy maʼlumotnomalar masofaviy tarzda onlayn beriladi

Rossiya Federatsiyasida 2026-yil yakuniga qadar tibbiy maʼlumotnomalar va hujjatlarni masofaviy tarzda rasmiylashtirish tizimini mamlakat boʻylab toʻliq joriy etish koʻzda tutilmoqda. Bu haqda Zamin.uz xabar berdi.

Bu haqda Davlat dumasidagi chiqishi davomida Rossiya Federatsiyasi sogʻliqni saqlash vaziri oʻrinbosari Vadim Vankov maʼlum qildi. Ixbt.com nashrining yozishicha, mazkur loyiha hozirda Raqamli rivojlanish vazirligi bilan hamkorlikda ishlab chiqilgan boʻlib, Tyumen viloyati hamda Chuvashiston Respublikasida sinov rejimida faoliyat koʻrsatmoqda.

Yangi tizimning asosiy afzalligi shundaki, zarur tibbiy hujjatlar bemorning elektron tibbiy kartasidagi maʼlumotlar asosida avtomatik tarzda shakllantiriladi. Bunda fuqarolar ilgari poliklinikalarga tashrif buyurib, navbat kutishga majbur boʻlgan eng koʻp talab qilinadigan maʼlumotnomalar, xulosalar va kasallik varaqalarini onlayn tarzda olish imkoniga ega boʻladilar.

Vadim Vankovning qayd etishicha, vazirlikning bosh maqsadi aholini shunchaki qogʻoz hujjatni rasmiylashtirish uchun tibbiyot muassasasiga borish majburiyatidan xalos etishdir. Jarayon toʻliq raqamli formatga oʻtkazilib, fuqaro davlat xizmatlari portali orqali elektron soʻrov qoldirishi yetarli boʻladi.

Tizim avtomatik tarzda ishlov berganidan soʻng, tayyor hujjat elektron koʻrinishda ariza beruvchiga Max milliy messenjeri orqali yuboriladi. Bu loyiha sogʻliqni saqlash tizimidagi byurokratik jarayonlarni qisqartirish va raqamli texnologiyalarni kundalik hayotga kengroq tatbiq etish yoʻlidagi muhim qadam sifatida baholanmoqda.