Miya faoliyatini saqlash uchun ratsionni nazorat qilish muhim

Nevrolog Galina Chudinskaya miya faoliyati va kognitiv salomatlikka salbiy ta’sir ko‘rsatuvchi omillar xususida o‘z fikrlari bilan o‘rtoqlashdi. Bu haqda Zamin.uz xabar berdi.

Lenta.ru nashriga bergan intervyusida mutaxassis xotira hamda aqliy qobiliyatlarning pasayishiga olib kelishi mumkin bo‘lgan oziq-ovqat mahsulotlari ro‘yxatiga to‘xtalib o‘tdi. Shifokorning qayd etishicha, miya funksiyalarining zaiflashuvi ko‘pincha ma’lum bir turdagi yegulik emas, balki insonning kundalik ovqatlanish tartibi va turmush tarzi bilan bevosita bog‘liq.

Chudinskaya inson ratsionidagi muvozanatsizlik miya hujayralariga hamda ularning o‘zaro aloqasiga putur yetkazishi mumkinligini ta’kidlaydi. Xususan, shakar va qayta ishlangan mahsulotlarni me’yoridan ortiq iste’mol qilish neyronlar holatiga salbiy ta’sir etadi.

Mutaxassis xotirani mustahkamlash va fikrlash qobiliyatini saqlab qolish uchun ovqatlanish ratsionini tartibga solish hamda zararli moddalardan voz kechish muhimligini eslatib o‘tdi. Uning so‘zlariga ko‘ra, miya salomatligini asrash uzoq muddatli jarayon bo‘lib, u sifatli oziq-ovqat mahsulotlarini tanlashdan boshlanadi.