Milliy tibbiyot markazining rentgen-endovaskulyar jarrohlari tibbiyot amaliyotida murakkab hisoblangan jarrohlik muolajasini muvaffaqiyatli yakunlashdi. Bu haqda Zamin.uz xabar berdi.
Shifokorlar jamoasi 2005 yilda tug‘ilgan bemorda yuqori kovak vena sohasida ballon angioplastikasi amaliyotini o‘tkazdi. Bemorda avval taloq a’zosini olib tashlash bilan bog‘liq operatsiya o‘tkazilgan bo‘lib, bu holat keyinchalik asoratlarni keltirib chiqargan.
Asosiy xastalik oqibatida bemorning jigar faoliyatida ham jiddiy o‘zgarishlar va zararlanish belgilari yuzaga kela boshladi. Mazkur vaziyatda shifokorlar oldida yuqori kovak venadagi qon aylanish jarayonini to‘liq tiklash hamda tomir torayishini bartaraf etishdek muhim vazifa turgan edi.
Mutaxassislar tomonidan amalga oshirilgan zamonaviy endovaskulyar texnologiyalar yordamida tomirdagi to‘siqlar muvaffaqiyatli bartaraf etildi. Hozirgi vaqtda bemorning umumiy holati barqarorlashib, uning hayotiy ko‘rsatkichlari nazoratga olingan.
Ushbu tibbiy muolaja bemorning kelgusi sog‘lig‘ini tiklash va jigar faoliyatidagi salbiy jarayonlarning oldini olishda hal qiluvchi ahamiyat kasb etadi.
Izohlar
0