O‘zbekistonda jamoat xavfsizligini mustahkamlash, mahallalarda huquqbuzarliklarning oldini olish hamda ko‘chalarda jamoat tartibini saqlash bo‘yicha keng ko‘lamli islohotlar jarayoni boshlandi. Bu haqda Zamin.uz xabar berdi.
Mazkur yo‘nalishdagi ishlar samaradorligini oshirish maqsadida davlat rahbari tomonidan tegishli qaror qabul qilindi. Prezidentning Ichki ishlar organlarining jamoat xavfsizligini ta’minlash faoliyatiga yangicha ishlash tizimini joriy etish chora-tadbirlari to‘g‘risidagi 314-sonli qarori mazkur tizimni tubdan yangilashga qaratilgan muhim huquqiy hujjat hisoblanadi.
Ushbu hujjatga ko‘ra, profilaktika inspektorlari, ya’ni hududiy uchastka nozirlarining vakolatlari sezilarli darajada kengaytirildi. Endilikda ular o‘zlariga biriktirilgan hududlarda xavfsizlikni ta’minlash borasida yanada mustaqil va aniq vazifalarni bajarishlari ko‘zda tutilgan.
Tizimga joriy etilayotgan bu o‘zgarishlar jinoyatchilikning barvaqt oldini olish va aholi xavfsizligini kafolatlashda muhim qadam bo‘lib xizmat qiladi. Yangi tartib asosida profilaktika inspektorlarining mahallalardagi faoliyati sifat jihatidan yangi bosqichga ko‘tarilishi va huquq-tartibot organlari hamda fuqarolar o‘rtasidagi hamkorlik aloqalari yanada mustahkamlanishi kutilmoqda.
Izohlar
0