O‘zbekistonda ko‘p qavatli uy-joy fondidagi liftlardan foydalanish tartibi va ularning texnik holatini nazorat qilish bo‘yicha yangi xavfsizlik standartlari joriy etilmoqda. Bu haqda Zamin.uz xabar berdi.
Mazkur o‘zgarishlarga ko‘ra, yo‘lovchi liftlarida qurilish mollari, ta’mirlash ishlari uchun mo‘ljallangan jihozlar hamda chiqindilarni tashishga nisbatan qat’iy taqiq o‘rnatildi. Ushbu cheklov liftlarning texnik nosozliklarini oldini olish hamda aholi xavfsizligini ta’minlash maqsadida amalga oshirilmoqda.
Yangilangan talablar doirasida liftlarning texnik nazorati kuchaytiriladi va ulardan maqsadli foydalanish tartibi qat’iy nazoratga olinadi. Mutaxassislarning fikricha, liftlarda og‘ir va yirik gabaritli yuklarni tashish texnik uskunalarning muddatidan avval eskirishiga hamda xavfli vaziyatlarning yuzaga kelishiga sabab bo‘ladi.
Endilikda boshqaruv servis kompaniyalari va uy egalari ushbu qoidalarga rioya etilishi uchun bevosita mas’ul hisoblanadilar. Mazkur chora-tadbirlar ko‘p qavatli binolardagi infratuzilmaning barqaror ishlashini ta’minlash va aholiga xizmat ko‘rsatish sifatini oshirishga qaratilgan bo‘lib, kelgusida nazorat mexanizmlari yanada takomillashtirib boriladi.
Izohlar
0