O‘zbekiston telekommunikatsiya bozorida tarixiy ahamiyatga molik yirik bitim imzolandi. Bu haqda Zamin.uz xabar berdi.
Mamlakatimizda Beeline Uzbekistan brendi ostida xizmat ko‘rsatib kelayotgan xalqaro VEON guruhi Perfectum savdo belgisi egasi bo‘lgan Rubicon Wireless kompaniyasining 100 foiz ulushini xarid qilish bo‘yicha yakuniy kelishuvga erishdi. Ushbu strategik xarid tarmoq faoliyatida yangi bosqichni boshlab berishi kutilmoqda.
Mazkur bitim natijasida ko‘p yillardan buyon alohida texnologik standart asosida faoliyat yuritib kelgan Perfectum operatori VEON guruhining texnik va infratuzilmaviy resurslaridan foydalanish imkoniyatiga ega bo‘ladi. Tahlilchilarning fikricha, mazkur jarayon mahalliy aloqa bozoridagi raqobat muhitiga sezilarli ta’sir ko‘rsatadi hamda xizmatlar sifatini oshirishga xizmat qiladi.
Tomonlar kelishuvni amalga oshirish jarayonida barcha huquqiy va me’yoriy talablarga rioya etilishini ta’kidlashmoqda. Bitimning yakunlanishi O‘zbekiston telekommunikatsiya infratuzilmasini modernizatsiya qilish va abonentlarga zamonaviy raqamli xizmatlarni taqdim etish borasidagi sa’y-harakatlarning mantiqiy davomi sifatida baholanmoqda.
Ayni vaqtda xarid bilan bog‘liq texnik jarayonlar belgilangan tartibda davom ettirilmoqda.
Izohlar
0