Apple kompaniyasining kelajakdagi mahsulotlari: Tim Kuk vorisi uchun o'nta yirik loyihani tayyorladi
Apple bosh direktori Tim Kuk o'z o'rnini egallashi kutilayotgan Jon Ternusga yaqin yillar ichida taqdim etilishi rejalashtirilgan o'nta yirik mahsulotdan iborat portfelni qoldirmoqda. Bu haqda Zamin.uz xabar berdi. Bloomberg tahlilchisi Mark Gurman ushbu o'zgarishlar va kompaniyaning kelajakdagi strategiyasi haqida ma'lumot berdi. Ternus kompaniya xodimlari bilan o'tkazilgan uchrashuvda mazkur rejalarni o'ta muhim deb atadi hamda yangi qurilmalar dunyo texnologiya bozorini o'zgartirishini ta'kidladi.
Kutilayotgan asosiy yangiliklardan biri buklama ekranli iPhone smartfonidir. Ushbu mahsulotni Jon Ternus shaxsan o'zi ommaga tanishtirishi rejalashtirilgan.
Shu yo'l bilan kompaniya yangi rahbarni innovatsion mahsulotlarning asosiy yuziga aylantirishni maqsad qilgan. Shuningdek, Apple sun'iy intellekt asosida ishlaydigan aqlli uy qurilmalari turkumini sezilarli darajada kengaytiradi.
Loyihalar qatoridan sensorli ekranga ega HomePod boshqaruv markazi, robotlashtirilgan maxsus stol roboti va xavfsizlik datchiklari o'rin olgan. Bundan tashqari, korporatsiya kameralar bilan jihozlangan aqlli ko'zoynaklar, atrof-muhitni tahlil qilish imkoniyatiga ega AirPods quloqchinlari hamda kichik aqlli kulon ustida ishlamoqda.
2026 yil oxiri yoki 2027 yil boshiga kelib sensorli ekranga ega ilk Mac noutbuklari sotuvga chiqarilishi kutilmoqda. Rejalar ro'yxatidan 20 dyuymli buklama iPad va kelajakda smartfonlar o'rnini bosishi mumkin bo'lgan yengil qo'shimcha reallik ko'zoynaklari ham joy olgan.
