Dunyo bo‘ylab milliardlab dollar boyligiga ega bo‘lgan insonlar soni ortib borayotgani aniqlangan. Forbes jurnali tomonidan e’lon qilingan hisobotda bu tendensiya tobora kuchayib borayotgani ko‘rsatilgan. Hozirgi vaqtda global miqyosda 3428 nafar milliarder mavjud bo‘lib, bu 2025 yilga nisbatan qariyb 400 nafarga ko‘pdir.
Tahlillarga ko‘ra, har kuni dunyoda kamida bitta yangi milliarder paydo bo‘lmoqda. Ushbu insonlarning umumiy boyligi 20,1 trillion dollarga baholanmoqda. Taqqoslash uchun, AQShning 2025 yildagi yalpi ichki mahsuloti taxminan 30 trillion dollarni tashkil etishi kutilmoqda.
Forbes reytingida birinchi o‘rinni Ilon Mask band etgan bo‘lib, uning boyligi asosan Tesla va SpaceX kompaniyalariga asoslangan. Undan keyin Google asoschilari Larri Peyj va Sergey Brin, Amazon asoschisi Jeff Bezos, Meta kompaniyasi rahbari Mark Tsukerberg kabi taniqli tadbirkorlar joy olgan.
Shuningdek, Nvidia kompaniyasi rahbari Jensen Xuang sun’iy intellekt sohasidagi rivojlanish oqibatida ilk bor top-10 ga kirgan. Rossiyadagi milliarderlar ro‘yxatida Alisher Usmonov 10-o‘rinda turibdi.
