AQSHning Texas shtatida joylashgan, bozor qiymati 4,8 million dollarga teng bo‘lgan hashamatli qarorgoh Airbnb platformasi orqali ijaraga berilgach, kutilmagan noxush holatlar yuz berdi. Bu haqda Zamin.uz xabar berdi.
Dastlabki kelishuvga ko‘ra, uy atigi yetti kishidan iborat guruh uchun kichik xususiy tadbir o‘tkazish maqsadida ijaraga olingan edi. Biroq va’da qilingan kichik yig‘in ijtimoiy tarmoqlar orqali keng tarqalib ketdi va natijada nazoratsiz ommaviy tadbirga aylanib qoldi.
Mazkur voqea joyiga 500 nafardan 800 nafargacha o‘smir yig‘ilgan. To‘planib qolgan yoshlarning tartibsiz harakatlari oqibatida hashamatli uyga jiddiy zarar yetkazildi.
Mulk egasi Kishore Karlapudi Texas shtatining Celina hududidagi o‘z uyida yuz bergan bu holatdan jiddiy xavotir bildirib, yuzaga kelgan moddiy ziyonni bartaraf etish yuzasidan tegishli choralarni ko‘rmoqda. Hozirgi vaqtda mazkur hodisa yuzasidan surishtiruv ishlari davom etmoqda.
Ushbu voqea yirik platformalar orqali uy-joy ijaraga berish bilan bog‘liq xavfsizlik va nazorat masalalarini yana bir bor dolzarb qilib qo‘ydi.
Izohlar
0