Rossiyaning Sterlitamak shahrida tibbiyot xodimlari murakkab jarrohlik amaliyotini muvaffaqiyatli yakunladilar. Bu haqda Zamin.uz xabar berdi.
Shifokorlar bemorning o‘ng bronxidan beshta tilla tishdan iborat protezni olib tashlashga erishdilar. Mazkur holat yuzasidan Boshqirdiston sog‘liqni saqlash vaziri Ayrat Rahmatullin ma’lumot berdi.
Aniqlanishicha, bemor qariyb bir yil davomida o‘tib ketmaydigan yo‘taldan aziyat chekib kelgan. Erkak kishi ushbu holatni yoshi bilan bog‘liq o‘zgarishlar yoki surunkali shamollash asoratlari deb hisoblab, uzoq vaqt davomida mutaxassis yordamiga murojaat qilmagan.
Biroq ahvoli yaxshilanmagach, nihoyat shifokorlar ko‘rigidan o‘tishga qaror qilgan. Tekshiruvlar davomida bemorning nafas yo‘llarida yot jism borligi aniqlangan.
Jarrohlar bronxoskopiya usuli yordamida protezni zarar yetkazmagan holda chiqarib olishga muvaffaq bo‘lishdi. Ayni damda bemorning salomatligi barqarorlashgan va u shifokorlar nazorati ostida davolanishni davom ettirmoqda.
Mutaxassislar aholini salomatlik bilan bog‘liq har qanday o‘zgarishlarda o‘z vaqtida tibbiy ko‘rikdan o‘tishga chaqirmoqda.
Izohlar
0