Muzliklarning erishi Yerning aylanish tezligiga salbiy ta’sir ko‘rsatmoqda

Global iqlim o‘zgarishi oqibatida qutb muzliklarining shiddat bilan erishi sayyoramizning o‘z o‘qi atrofida aylanish tezligiga bevosita ta’sir ko‘rsatmoqda. Bu haqda Zamin.uz xabar berdi.

Ilmiy tadqiqotlar shuni ko‘rsatadiki, mazkur jarayon sutka davomiyligini har yuz yillikda 1,33 millisoniyaga oshirmoqda. Ushbu ko‘rsatkich so‘nggi 3,6 million yil davomida kuzatilmagan darajaga yetgan.

Vena universiteti hamda Syurix texnologiya instituti olimlarining tahlillariga ko‘ra, Yerning aylanish energiyasidagi mazkur siljish kuchi magnitudasi 9 ballga teng bo‘lgan kuchli zilzila ta’siri bilan qiyoslanadi. Mutaxassislar ushbu holat insoniyat tomonidan amalga oshirilayotgan faoliyatning sayyora geologik tizimiga nisbatan xavfli darajada kuchayib borayotganidan dalolat berishini qayd etishmoqda.

Kelgusi prognozlarga ko‘ra, asr oxiriga borib, iqlim o‘zgarishi sutka uzunligini belgilovchi asosiy omilga aylanadi va hatto Oyning gravitatsion ta’siridan ham ustunlik qilishi mumkin. Bunday o‘zgarishlar GPS kabi yuqori aniqlikdagi texnologik tizimlar faoliyatida jiddiy uzilishlar yoki xatoliklarni keltirib chiqarishi ehtimoldan xoli emas.

Avvalgi ilmiy ishlar muzliklarning erishi Yer shaklining ham o‘zgarishiga sabab bo‘layotganini tasdiqlagan edi. Olimlarning xulosasiga ko‘ra, ushbu geodinamik jarayonlar kelajakda sayyora harakati va uning barqarorligiga yanada sezilarli ta’sir o‘tkazadi.