Eron va AQSh o'rtasidagi diplomatik inqiroz: muzokaralar to'xtab qoldi
Tehron va Vashington o'rtasidagi siyosiy muloqot jarayoni jiddiy to'siqlar sababli sekinlashdi. Bu haqda Zamin.uz xabar berdi. Eron tashqi ishlar vaziri Abbos Aroqchi Rossiya prezidenti Vladimir Putin bilan uchrashuvda diplomatik aloqalar boshi berk ko'chaga kirib qolganini ma'lum qildi. Eron Tashqi ishlar vazirligi xabariga ko'ra, Oq uyning muzokaralar samaradorligiga putur yetkazayotgan bir qator harakatlari Tehron e'tiroziga sabab bo'lmoqda.
Aroqchi muzokaralarning to'xtashiga AQSh tomonidan qo'yilayotgan mantiqsiz shartlar, muloqot davomida pozitsiyaning beqarorligi hamda diplomatiyaga zid tahdidli ritorikani asosiy omil sifatida ko'rsatdi. Shuningdek, Eron tomoni va'dalarning muntazam buzilishini ham qayd etdi.
Iqtisodiy cheklovlar va Eron savdo kemalariga nisbatan sodir etilayotgan harakatlar muloqotni davom ettirish imkoniyatini pasaytirmoqda. Tehron rasmiylari AQShning ushbu yondashuvi global xavfsizlikka salbiy ta'sir ko'rsatishi haqida xalqaro hamjamiyatni ogohlantirdi.
8 aprel sanasidan boshlab amal qilayotgan sulhga qaramay, Ho'rmuz bo'g'ozidagi dengiz qamali saqlanib qolmoqda. Donald Tramp Eron tinchlik taklifini bermaguncha cheklovlarni davom ettirishini bildirdi.
Shu sababli 22 aprel kuni Islomobodda o'tishi rejalashtirilgan muzokaralarning ikkinchi bosqichi bekor qilindi. Tehron uchrashuvni natijasiz deb baholab, o'z vakillarini yubormadi.
O'z navbatida, Tramp ham Stiv Uitkoff va Jared Kushnerning Pokistonga safarini bekor qilishga qaror qildi.
