AQSh Rossiya nefti savdosiga berilgan istisno muddatini 16 maygacha uzaytirdi

AQSh Rossiya nefti va neft mahsulotlari savdosiga berilgan istisno muddatini 16 maygacha uzaytirdi. Ushbu qaror global energiya bozoridagi noaniqliklar davom etayotgan bir paytda qabul qilindi. Xorijiy OAV xabar berishicha, Vashington Rossiya xom ashyosini tashuvchi tankerlarga berilgan ruxsatnomalar muddatini uzaytirishga qaror qilgan.

Avvalroq AQSh Moliya vaziri Skott Bessent ushbu imtiyozlarning yangilanmasligini bildirgan edi. Biroq, Yaqin Sharqda kuchaygan keskinlik oqibatida energiya narxlarining ortishi Oq uyning o'z pozitsiyasini qayta ko'rib chiqishiga sabab bo'ldi. Rossiya nefti uchun birinchi yengilliklar joriy yilning 13 martida berilgan edi.

The New York Times va Xalqaro energetika agentligining (XEA) tahlillariga ko'ra, sanktsiyalarning yumshatilishi Rossiyaga milliardlab dollar daromad keltirgan. XEA ma'lumotlariga qaraganda, mart oyida neft eksportidan tushgan daromad 19 milliard dollarga yetgan, bu fevral oyiga nisbatan deyarli ikki baravar ko'p.

Donald Tramp ma'muriyati ham ushbu chorani jahon bozorida neft narxlarini muvozanatlashtirish maqsadida qo'llagan. Ammo, Rossiyaning "soya floti" orqali cheklovlarga rioya qilmasdan neft eksport qilish amaliyoti narxlar ustidan to'liq nazoratni qiyinlashtirmoqda. Ushbu vaziyat global energiya bozorida barqarorlikni ta'minlash borasidagi sa'y-harakatlarni murakkablashtirmoqda.