"Union" klubi tarixidagi birinchi ayol bosh murabbiy tayinlandi

Berlinning "Union" klubi tarixiy qaror qabul qildi. Bu haqda Euro-football.ru xabar berdi.

Jamoaning yangi bosh murabbiyi etib Mari-Luize Eta tayinlandi. U Bundesligada professional klubni boshqargan birinchi ayol mutaxassisga aylandi.

Yangi murabbiy matbuot anjumanida ishtirok etib, jamoaning "Volfsburg"ga qarshi bo‘ladigan o‘yini oldidan o‘z fikrlari bilan o‘rtoqlashdi. Germaniya chempionatining 30-tur doirasidagi ushbu uchrashuv 18-aprel kuni bo‘lib o‘tadi.

Bild nashri xabariga ko‘ra, Mari-Luize Eta o‘ziga ko‘rsatilgan ishonch uchun minnatdorchilik bildirgan hamda yakuniy dam olish kunlari bo‘ladigan o‘yinni intizorlik bilan kutayotganini ta’kidlagan. Shuningdek, u ushbu tayinlovning nafaqat sport, balki ijtimoiy va ramziy jihatdan ham katta ahamiyatga ega ekanligini tan oldi.

Bosh murabbiy lavozimni taklif qilish paytida ikkilanganimi haqidagi savolga javob berar ekan, Eta hech qanday shubhalari bo‘lmaganini aytdi. U dastlab kutilmagan taklifdan hayratda qolganini, biroq darhol ishga kirishib, jamoani o‘yinga tayyorlash strategiyalari ustida ish boshlaganini ta’kidladi.

Futboldagi gender masalalariga to‘xtalganda, mutaxassis sportda ayollar ishtiroki yangilik emasligini va vaqt o‘tishi bilan bunday savollarning ahamiyati yo‘qolishini umid qildi. Uning fikricha, jinsidan qat’i nazar, barcha mutaxassislarning asosiy maqsadi eng yuqori natijalarga erishishdir.

Hozirgi vaqtda "Union" klubi 32 ochko bilan turnir jadvalining o‘n birinchi pog‘onasida joy olgan bo‘lsa, raqibi "Volfsburg" 21 ochko bilan o‘n yettinchi o‘rinda turibdi.