Germaniyaning «Leyptsig» klubi milliy chempionatdagi tanaffusdan unumli foydalanish maqsadida o‘rtoqlik uchrashuvi tashkil etdi. Bu haqda Euro-football.ru xabar berdi.
Raqib sifatida Chexiya oliy divizionida uchinchi o‘rinni egallab turgan «Mlada-Boleslav» jamoasi tanlab olindi. Garchi raqib Yevropa futbolida grand jamoalar qatoriga kirmasa-da, o‘yin kutilmagan natija va gollarga boy tarzda kechdi.
Qiziqarli va murosasiz kechgan bahs 5:4 hisobida chexiyaliklarning g‘alabasi bilan yakunlandi. Uchrashuv nafaqat natijasi, balki o‘yin yakunidagi g‘ayrioddiy voqea bilan ham muxlislar e’tiborini tortdi.
«Leyptsig» jamoasi o‘yin so‘ngida bir kishi kam bo‘lib qoldi va hal qiluvchi golni o‘tkazib yubordi. Bunga sabab bo‘lgan holat esa futbol olamida kam uchraydigan va biroz kulgili tus oldi.
Jamoa himoyachisi Maksim Estev to‘p uchun kurash vaqtida keskin vaziyatga tushib qoldi va natijada uning sport kiyimi – shortisi yirtilib ketdi. Futbolchi yangi forma kiyish uchun maydon chetiga chiqishga majbur bo‘ldi.
Biroq bosh hakam o‘yinni to‘xtatib turishdan bosh tortdi. Natijada «Leyptsig» bir necha daqiqa davomida kamchilik bo‘lib o‘ynashga majbur bo‘ldi va aynan shu vaqt oralig‘ida raqib g‘alaba to‘pini kiritishga muvaffaq bo‘ldi.
Ushbu g‘alati hodisa futbol jamoatchiligi orasida keng muhokamalarga sabab bo‘ldi.
Izohlar
0