Krishtianu Ronaldu transferidan so‘ng katta ambitsiyalarni ko‘zlagan Saudiya Arabistonining Al-Nasr klubi jiddiy moliyaviy qiyinchiliklarga yuz tutdi. Bu haqda Zamin.uz xabar berdi.
Mahalliy ommaviy axborot vositalarining xabar berishicha, jamoaning umumiy moliyaviy majburiyatlari 800 million riyol, ya'ni taxminan 213 million dollarga yetgan. Ushbu holat klubning yozgi transfer siyosatiga salbiy ta'sir ko‘rsatib, yangi futbolchilarni jalb etish jarayonini deyarli to‘xtatib qo‘ydi.
Mavjud vaziyatdan chiqib ketish va klubni inqirozdan qutqarish maqsadida rahbariyat bir qator keskin choralarni ko‘rib chiqmoqda. Muhokama qilinayotgan rejalar orasida klub boshqaruv organlari vakolatlarini cheklash hamda tashkiliy tuzilmani qayta ko‘rib chiqish kabi masalalar o‘rin olgan.
Klub moliyaviy barqarorlikni qayta tiklash uchun xarajatlarni optimallashtirish va byudjet taqchilligini yopish bo‘yicha shoshilinch qadamlar qo‘yishga majbur bo‘lmoqda. Ayni vaqtda jamoa rahbariyati yuzaga kelgan vaziyatni barqarorlashtirish hamda kelgusi mavsumga tayyorgarlik ko‘rish uchun xalqaro moliya qoidalari doirasida harakat qilishni rejalashtirmoqda.
Kelgusida klubning qanday strategik o‘zgarishlarga qo‘l urishi futbol jamoatchiligi e'tibor markazida qolmoqda.
