Toshkent shahrining Yakkasaroy tumanida joylashgan gaz taqsimlash tizimida yuzaga kelgan nosozlik sababli hududdagi iste’molchilarni tabiiy gaz bilan ta’minlash vaqtincha to‘xtatilishi rejalashtirilmoqda. Bu haqda Zamin.uz xabar berdi.
Hududiy gaz ta’minoti korxonasi mutaxassislari tomonidan olib borilgan o‘rganishlar davomida Shota Rustaveli ko‘chasidagi 120-ko‘p qavatli uy oldida joylashgan quduqda texnik muammo aniqlangan. Xususan, yer ostidan o‘tgan diametri 400 millimetrga teng bo‘lgan o‘rta bosimli gaz quvurining kompensator qismida gaz sizib chiqish holati qayd etilgan.
Mazkur nosozlik avariya holatiga olib kelishi mumkinligi sababli uni zudlik bilan bartaraf etish talab etiladi. Ta’mirlash ishlari davomida xavfsizlik choralarini ko‘rish maqsadida ayrim mahallalar va ko‘chalarda gaz ta’minoti vaqtincha uzib turiladi.
Mutaxassislar zaruriy choralarni ko‘rib, ta’mirlash ishlarini qisqa muddatda yakunlash va gaz uzatilishini qayta tiklashni maqsad qilgan. Iste’molchilardan vaqtincha yuzaga kelayotgan noqulayliklar uchun tushunish so‘raladi hamda gaz uskunalaridan foydalanishda xavfsizlik qoidalariga qat’iy rioya etish tavsiya qilinadi.
Izohlar
0