O‘zbekiston Respublikasi Prezidenti Shavkat Mirziyoyev 7 oktyabr kuni amaliy tashrif bilan Turkmanistonga yetib bordi. Bu haqda Zamin.uz xabar berdi.
Davlat rahbarining mazkur safari ikki muhim xalqaro anjumanda ishtirok etishni ko‘zda tutadi. Xususan, 8 oktyabr kuni Markaziy Osiyo davlatlari va Ozarbayjon rahbarlarining sakkizinchi Maslahat uchrashuvi bo‘lib o‘tishi rejalashtirilgan.
Shundan so‘ng, 9 oktyabr sanasida Mustaqil Davlatlar Hamdo‘stligi sammiti o‘z ishini boshlaydi. Turkmanboshi xalqaro aeroportida oliy martabali mehmonni Turkmaniston rasmiy vakillari kutib oldilar.
Tashrif doirasida mintaqaviy hamkorlikni yanada mustahkamlash, iqtisodiy va madaniy aloqalarni rivojlantirish hamda ko‘p tomonlama muloqotni jadallashtirish masalalari ko‘rib chiqiladi. Prezidentlar ishtirokida o‘tadigan mazkur tadbirlar mintaqada xavfsizlik va barqarorlikni ta’minlash, shuningdek, savdo-iqtisodiy salohiyatni yuksaltirishda muhim ahamiyat kasb etishi kutilmoqda.
Shavkat Mirziyoyevning Turkmanistonga amalga oshirayotgan ushbu tashrifi ikki tomonlama hamda mintaqaviy darajadagi munosabatlarning yangi bosqichiga xizmat qiladi.
Izohlar
0