Turkiya O‘zbekiston armiyasini modernizatsiya qilishda yaqindan ko‘maklashadi

O‘zbekiston va Turkiya o‘rtasidagi ko‘p asrlik tarixiy aloqalar bugungi kunda sifat jihatidan yangi, strategik bosqichga ko‘tarilmoqda. Bu haqda Zamin.uz xabar berdi.

Ikki mamlakat iqtisodiy va madaniy sohalar bilan bir qatorda, mudofaa hamda xavfsizlik yo‘nalishlarida ham yaqindan hamkorlik qilmoqda. Turkiya milliy mudofaa vaziri Yashar Gyulerning bayonotiga ko‘ra, Anqara O‘zbekiston Qurolli Kuchlarini tizimli isloh qilish va zamonaviy talablar asosida rivojlantirishga ko‘maklashish maqsadida Toshkentga tajribali harbiy maslahatchilar guruhini yo‘lladi.

Bu haqda Turkiyaning nufuzli Sabah nashri xabar bermoqda. Yashar Gyulerning ta’kidlashicha, Turkiya armiyasining zamonaviy tuzilmasi va boy tajribasi ko‘plab do‘stona davlatlar uchun namuna vazifasini o‘tamoqda.

O‘zbekiston ham ushbu qardosh mamlakatlar qatorida turk harbiy modelini o‘z tizimiga tatbiq etishdan manfaatdor. Vazir Ozarboyjon misolida bo‘lgani kabi, O‘zbekistonga ham malakali mutaxassislar yuborilganini tasdiqladi.

Eslatib o‘tamiz, joriy yilning yanvar oyida ikki davlat mudofaa vazirliklari o‘rtasida hamkorlik rejasi imzolangan edi. Hujjat qo‘shma mashg‘ulotlar, kadrlar tayyorlash va harbiy-tibbiyot sohasidagi strategik yo‘nalishlarni qamrab oladi.

Mutaxassislar ushbu tashabbusni Ozarboyjon armiyasini modernizatsiya qilishda qo‘llanilgan va o‘z samarasini bergan tajribaning mantiqiy davomi sifatida baholamoqda. Boku va Anqara o‘rtasidagi harbiy sheriklik, xususan, innovatsion texnologiyalar va uchuvchisiz uchish apparatlaridan foydalanishda katta muvaffaqiyat keltirgan edi.

Endilikda xuddi shunday sinovdan o‘tgan tajriba O‘zbekiston mudofaa salohiyatini yuksaltirishga hamda Markaziy Osiyo mintaqasida xavfsizlikni ta’minlashga xizmat qiladi.