Toshkent shahrining Yashnobod, Mirobod va Sergeli tumanlarida eskirgan uy-joy fondini yangilash va shahar infratuzilmasini zamonaviy talablar asosida qayta qurishga qaratilgan renovatsiya dasturi amalga oshirilmoqda. Bu haqda Zamin.uz xabar berdi.
Mazkur jarayon doirasida hududlarda istiqomat qiluvchi aholi o‘rtasida turli savollar yuzaga kelayotgani tabiiy hol. Xususan, mulkdorlarni eng ko‘p qiziqtirayotgan masala bu ko‘chmas mulk egalarining kelgusi taqdiri va ularga taqdim etiladigan kafolatlar bilan bog‘liqdir.
Rasmiy ma’lumotlarga tayanadigan bo‘lsak, renovatsiya hududlariga tushgan xonadon egalari hech qanday holatda uy-joydan majburiy tarzda mahrum qilinmaydi va ular kompensatsiyasiz qoldirilmaydi. Davlat dasturiga ko‘ra, mulkdorlarning huquq va manfaatlari qat’iy himoya qilinadi.
Har bir fuqaroga yangi qurilayotgan xonadonlardan qulayliklari bilan ajralib turuvchi uy-joylar taqdim etish nazarda tutilgan. Ushbu jarayon shaffof tartibda, qonunchilik talablariga rioya etilgan holda amalga oshirilishi belgilab qo‘yilgan.
Ayni paytda mutasaddi tashkilotlar tomonidan aholi bilan tushuntirish ishlari olib borilmoqda hamda har bir mulkdorning taklif va istaklari alohida o‘rganilmoqda. Maqsad shahar qiyofasini yaxshilash bilan bir qatorda, fuqarolarning turmush sharoitini sifat jihatidan yangi bosqichga ko‘tarishdan iborat.
Izohlar
0