O‘zbekiston va BAA davlat boshqaruvini baholash tizimini joriy etadi

O‘zbekiston davlat boshqaruvi tizimini yangi bosqichga olib chiqish va davlat organlari ish samaradorligini tubdan oshirish maqsadida muhim qadam tashlandi. Bu haqda Zamin.uz xabar berdi.

Prezident tomonidan Birlashgan Arab Amirliklari bilan hamkorlikda Sifatli davlat boshqaruvi qo‘shma dasturini hayotga tatbiq etish to‘g‘risidagi farmoyish imzolandi. Mazkur tashabbus davlat sektoridagi ish jarayonlarini ochiq, shaffof va natijaga qaratilgan zamonaviy usullar asosida tashkil etishni ko‘zda tutadi.

2026 yildan e’tiboran vazirliklar, qo‘mitalar, agentliklar va mahalliy ijro etuvchi hokimiyat organlari faoliyati har ikki yilda bir marotaba majburiy baholashdan o‘tkaziladi. Baholash jarayonida idoralarning islohotlarni bajarish darajasi, aholi hamda tadbirkorlik subyektlari uchun yaratilgan qulayliklar va boshqaruv sifati kabi muhim ko‘rsatkichlar tahlil qilinadi.

Bu jarayonni muvofiqlashtirish Strategik rivojlanish va islohotlar agentligi hamda Boshqaruv samaradorligi agentligiga yuklatildi. Mas’ul idoralar baholash mezonlarini ishlab chiqish va tahlillar asosida tegishli tavsiyalar tayyorlash bilan shug‘ullanadi.

Yangi tizim nafaqat nazoratni, balki samarali ishlagan tashkilotlarni rag‘batlantirishni ham o‘z ichiga oladi. Yuqori ko‘rsatkichlarga erishgan idoralar maxsus mukofotlar bilan taqdirlanadi.

Mazkur mexanizm davlat boshqaruvida sog‘lom raqobatni kuchaytirib, byurokratik to‘siqlarni qisqartirishga hamda idoralarning faoliyatini real natijalar asosida baholash tizimiga o‘tishga xizmat qiladi.