O‘zbekiston Respublikasi huquq-tartibot va xavfsizlik tuzilmalarida uzoq yillar davomida samarali faoliyat yuritib kelgan, jamoatchilik orasida Temir Botir nomi bilan tanilgan Botir Bahromovich Qudratxo‘jayev Mudofaa vaziri lavozimiga tayinlandi. Bu haqda Zamin.uz xabar berdi.
Davlat rahbari farmoni bilan amalga oshirilgan ushbu tayinlov mamlakat mudofaa salohiyatini mustahkamlash va sohadagi boshqaruv tizimini takomillashtirishga qaratilgan navbatdagi qadam sifatida baholanmoqda. Botir Bahromovich Qudratxo‘jayev o‘zining ko‘p yillik mehnat faoliyati davomida huquqni muhofaza qiluvchi organlarning turli bo‘g‘inlarida mas’uliyatli vazifalarni bajargan.
U xususan, fuqarolik va harbiy prokuratura organlarida, Majburiy ijro byurosida, shuningdek, Favqulodda vaziyatlar hamda Ichki ishlar vazirliklarida rahbarlik lavozimlarida ishlagan. Professional faoliyati davomida tizimning barcha pog‘onalarini bosib o‘tgan tajribali mutaxassis sifatida u o‘ziga yuklatilgan vazifalarni sifatli bajarishi bilan ajralib turadi.
Mutaxassislarning fikricha, Botir Qudratxo‘jayevning boy tajribasi va boshqaruvdagi qat’iyati mudofaa vazirligi faoliyatini yanada samarali tashkil etishda muhim omil bo‘lib xizmat qiladi. Yangi vazir oldida turgan ustuvor vazifalar qatorida harbiy xizmatchilarning jangovar tayyorgarligini oshirish, milliy armiyani zamonaviy texnikalar bilan ta’minlash hamda tizimdagi intizomni yanada kuchaytirish masalalari turibdi.
Izohlar
0