Dunyoga mashhur bloger MrBeastning O‘zbekiston bo‘ylab amalga oshirayotgan safari kutilmaganda yangi bosqichga chiqishi mumkin. Bu haqda Zamin.uz xabar berdi.
Blogerning ijodiy jamoasi tomonidan ma’lum qilinishicha, joriy yilning 10 oktyabr sanasidan e’tiboran mamlakatimizning tarixiy shaharlari hisoblangan Samarqand, Buxoro va Xivaga tashrif buyurish rejalashtirilgan. Mazkur ma’lumot 9 oktyabr kuni poytaxt Toshkent shahrida o‘tkazilgan muxlislar bilan uchrashuv jarayonida jamoa vakillari tomonidan rasman tasdiqlandi.
Tashkilotchilar ushbu safar davomida xavfsizlik choralarini yuqori darajada ta’minlash hamda tasvirga olish jarayonlarining maxfiyligini saqlash ustuvor vazifa ekanligini ta’kidlashdi. Ayni paytda blogerning O‘zbekiston bo‘ylab sayohati nafaqat uning muxlislari, balki keng jamoatchilik tomonidan ham katta qiziqish bilan kuzatilmoqda.
Jamoa vakillari tashrif doirasida amalga oshiriladigan loyihalar va suratga olish ishlari haqida batafsil ma’lumot berishdan hozircha tiyilib turishibdi. Shunga qaramay, mazkur tashrif mamlakatimizning turistik salohiyatini xalqaro miqyosda targ‘ib qilishda muhim ahamiyat kasb etishi kutilmoqda.
Izohlar
0