Suniy intellekt tokenlari uchun yangi fyuchers savdolari boshlanmoqda

Sunʼiy intellekt texnologiyalarining jadal rivojlanishi moliya bozorlarida yangi turdagi aktivlar sinfini shakllantirish zaruratini keltirib chiqarmoqda. Bu haqda Zamin.uz xabar berdi.

Xususan, yirik moliyaviy guruhlar LLM tokenlari uchun maxsus infratuzilmani yaratishga qaratilgan saʼy-harakatlarni faollashtirdi. Reuters agentligining maʼlum qilishicha, Shanxay fyuchers birjasi ayni damda sunʼiy intellekt tokenlari savdosi bilan bogʻliq derivativlar bozorini loyihalashtirish ishlarini olib bormoqda.

Techcrunch.com nashri tasdiqlaganidek, ushbu tashabbus CME Group hamda NYSE egasi boʻlgan Intercontinental Exchange kabi global birjalarning GPU ijarasi boʻyicha fyuchers shartnomalarini ishlab chiqish jarayoni bilan bir vaqtga toʻgʻri keldi. Hozirgi kunda videokartalar ijarasi bozorida soatbay narxlar shakllangan boʻlsa-da, tokenlar uchun infratuzilma hali ham rivojlanish bosqichida qolmoqda.

AI Mining Co. tahlillariga koʻra, NVIDIA H100 grafik protsessorlarining ijara qiymati soatiga 1,40 dollardan 4,27 dollargacha, H200 modellari uchun esa 2,34 dollardan 5 dollargacha yetmoqda.

Ayni paytda OpenAI oʻzining GPT-5.5 modeli API xizmatlari uchun har million kirish tokeniga 5 dollar, chiqish tokeniga esa 30 dollar miqdorida haq belgilagan. Amazon Bedrock kabi yirik bulutli platformalar ham toʻlovlarni aynan tokenlar tizimiga oʻtkazmoqda.

Shanxay birjasining mazkur loyihasi AI kompaniyalari xizmatlarini narxlash mexanizmlariga bogʻlangan boʻlib, u investorlar va maʼlumotlar markazlari operatorlariga hisoblash quvvati bilan bogʻliq xarajatlarning oʻzgarishi (volatil) xatarlarini xejirlash, yaʼni sugʻurtalash imkoniyatini taqdim etadi.