Sun’iy intellekt rivoji qonunchilik tizimlaridan tezroq o‘zib ketmoqda

Birlashgan Millatlar Tashkiloti tarkibidagi mustaqil ekspertlar guruhi sun’iy intellekt texnologiyalarining shiddatli rivojlanish sur’atlari hamda mavjud huquqiy va me’yoriy baza ushbu o‘zgarishlarga moslasha olmayotgani yuzasidan yangi hisobot taqdim etdi. Bu haqda Zamin.uz xabar berdi.

Ilmiy kengash xulosasiga ko‘ra, mazkur texnologik tarmoqdagi taraqqiyot shunchalik tez kechmoqdaki, dasturiy modellar imkoniyatlari har bir necha oy ichida sezilarli darajada kengayib bormoqda. Bunday tezkorlik an’anaviy qonunchilik tizimlarining samaradorligini pasaytirib, ularni zamonaviy chaqiriqlar oldida ojiz qoldirmoqda.

Mutaxassislar fikricha, sun’iy intellekt sohasidagi texnik yutuqlar davlat boshqaruvi va xalqaro nazorat mexanizmlaridan oldinlab ketgan. Bu holat axborot xavfsizligi, shaxsiy ma’lumotlar daxlsizligi hamda texnologiyalardan noto‘g‘ri foydalanish xavfini kuchaytiradi.

Hisobotda qayd etilishicha, hukumatlar va xalqaro tashkilotlar sun’iy intellektni tartibga solishda yanada moslashuvchan va tezkor mexanizmlarni ishlab chiqishi zarur. Aks holda, texnologik rivojlanish nazoratdan chiqib ketishi va jamiyat uchun kutilmagan ijtimoiy-iqtisodiy oqibatlarni keltirib chiqarishi mumkin.

Hozirgi vaziyatda texnologik taraqqiyotni xavfsizlik talablari bilan uyg‘unlashtirish global miqyosdagi eng dolzarb vazifalardan biri bo‘lib qolmoqda.