Harbiy prokuratura Taftish.uz sayti xodimlariga oid jinoyat ishini tergov qilmoqda
Taftish.uz xodimlari bilan bog'liq jinoyat ishi bo'yicha tergov jarayonlarini endilikda harbiy prokurorlar davom ettirmoqda. Bu haqda Zamin.uz xabar berdi. Bu haqda jamoatchilik faoli Abdurahmon Tashanov ma'lum qildi. Tergov materiallariga ko'ra, ushbu ish doirasida gumon qilinayotgan shaxslar tovlamachilik va firibgarlik kabi jinoyatlarni sodir etganlikda ayblanishi mumkin.
Mazkur shaxslar 2024 yilning yanvar oyida huquq-tartibot idoralari tomonidan qo'lga olingan edi. Hozirgi vaqtga qadar mazkur ish yuzasidan 400 dan ortiq fuqaroning murojaatlari o'rganib chiqilgani ta'kidlanmoqda.
Tergov jarayonining Harbiy prokuratura ixtiyoriga o'tkazilishiga ish materiallarida ayrim maxsus xizmat xodimlarining ismlari tilga olingani sabab bo'lgan. Surishtiruv jarayonidagi ayrim ma'lumotlar davlat siri yoki maxfiy xarakterga ega bo'lganligi bois, kelgusidagi sud majlislari yopiq tarzda o'tkazilishi ehtimoli mavjud.
Hozirda tergov harakatlari belgilangan tartibda davom ettirilmoqda.
