O‘zbekistonda uzoq muddat davomida o‘z doimiy yashash manzilida bo‘lmagan, xorijiy davlatlarda ta’lim olgan yoki mehnat faoliyatini yuritgan fuqarolarga nisbatan hisoblangan asossiz qarzdorliklar bekor qilindi. Bu haqda Zamin.uz xabar berdi.
Ushbu masala bo‘yicha Raqobat qo‘mitasi tomonidan tegishli vazirlik va idoralar bilan hamkorlikda amalga oshirilgan keng qamrovli o‘rganishlar ijobiy natija berdi. Tahlillar shuni ko‘rsatdiki, ko‘plab fuqarolarga ular aslida foydalanmagan kommunal xizmatlar yoki boshqa majburiyatlar uchun asossiz ravishda to‘lovlar yuklangan.
Olib borilgan nazorat tadbirlari natijasida respublika miqyosida jami 800 ming nafarga yaqin fuqaroning qonuniy manfaatlari himoya qilindi va ularning huquqlari tiklandi. Mazkur jarayon doirasida fuqarolar zimmasiga asossiz yuklangan 22 milliard so‘mlik qarzdorlik hisobdan chiqarildi.
Davlat organlari tomonidan ko‘rilgan ushbu choralar aholining ortiqcha sarson bo‘lishining oldini olish hamda xizmat ko‘rsatuvchi tashkilotlar faoliyatida shaffoflikni ta’minlashga xizmat qiladi. Kelgusida ham bunday nohaq hisob-kitoblarning oldini olish maqsadida nazorat mexanizmlari kuchaytirilishi nazarda tutilgan.
Izohlar
0