Ispaniya bashorat bozorlari faoliyatini vaqtincha cheklab qo‘ydi

Ispaniyaning qimor oʻyinlarini nazorat qiluvchi organi DGOJ mamlakat hududida Polymarket va Kalshi bashorat bozorlariga kirishni vaqtincha cheklash toʻgʻrisida qaror qabul qildi. Bu haqda Zamin.uz xabar berdi.

Ijtimoiy huquqlar, isteʼmol va 2030 kun tartibi vazirligi ushbu platformalar litsenziyasiz faoliyat yuritayotgani sababli ularga nisbatan huquqiy jarayon boshlaganini maʼlum qildi. Mazkur cheklov ehtiyot chorasi sifatida joriy etilgan boʻlib, tekshiruv ishlari yakunlanguniga qadar, taxminan 3-4 oy davomida oʻz kuchida qoladi.

Cointelegraph.com nashrining yozishicha, DGOJ talqiniga koʻra, kelajakdagi noaniq hodisalarga pul tikishni nazarda tutuvchi bashorat bozorlari qimor oʻyinlari toifasiga kiradi. Shu boisdan, ushbu xizmatlarni taqdim etish uchun maxsus maʼmuriy ruxsatnoma talab etiladi.

Ispaniyaning ushbu qarori shunga oʻxshash chora Indoneziya hukumati tomonidan qoʻllanilganidan soʻng qabul qilindi. Avstraliya, Fransiya, Polsha, Singapur, Ukraina va Shveysariya kabi davlatlar ham qimor qonunchiligiga muvofiq ushbu platformalarga cheklov oʻrnatgan.

AQSHda esa Kalshi va Polymarket mahalliy tartibga soluvchilarning bosimi ostida qolmoqda. DeFi Rate maʼlumotlariga koʻra, mazkur ikki platformaning haftalik umumiy savdo hajmi 6,1 milliard USDni tashkil etadi.

Ayni paytda AQSH Kongressining Nazorat va hukumat islohotlari qoʻmitasi platformalarda insayderlik savdolari boʻyicha tekshiruv olib bormoqda. Qoʻmita raisi James Comer ayrim foydalanuvchilar maxfiy maʼlumotlardan foydalangan holda shubhali bitimlar amalga oshirgan boʻlishi mumkinligidan xavotir bildirgan.

Polymarket vakillari hamkorlikka tayyorligini bildirgan boʻlsa, Kalshi tomoni vaziyat yuzasidan izoh berishdan saqlanib qolmoqda.