Rossiyada harbiy xizmatga safarbar etilayotgan erkaklar bilan shoshilinch nikoh qurish va ular jangovar harakatlar davomida halok bo‘lgan taqdirda davlat tomonidan ajratiladigan tovon pulini qo‘lga kiritishga bo‘lgan urinishlar kuzatilmoqda. Bu haqda Zamin.uz xabar berdi.
Jamoatchilik orasida bunday xatti-harakatlarni amalga oshirayotgan shaxslar shartli ravishda qora bevalar deb atalmoqda. Kuzatuvchilarning qayd etishicha, mazkur sxemaning asosiy maqsadi qonuniy nikoh orqali harbiy xizmatchining vafotidan so‘ng beriladigan katta hajmdagi moddiy kompensatsiyaga ega chiqishdan iborat.
Hozirgi kunda huquqni muhofaza qiluvchi organlar va ijtimoiy xizmatlar ushbu holatlarni diqqat bilan o‘rganmoqda. Ma’lumotlarga ko‘ra, harbiy xizmatchi halok bo‘lganida uning qonuniy turmush o‘rtog‘i tovon pulini olish uchun ustuvor huquqqa ega bo‘ladi.
Aynan shu huquqiy jihatdan foydalanib, g‘arazli niyatdagi ayollar frontga ketayotgan erkaklar bilan rasmiy nikoh tuzishga intilmoqda. Ushbu holat nafaqat axloqiy, balki huquqiy bahslarni ham keltirib chiqarmoqda.
Mutaxassislar bunday firibgarlik yo‘llarining oldini olish uchun oilaviy munosabatlar va nikoh shartnomalarini rasmiylashtirish jarayonida qat’iyroq tartib-qoidalar joriy etish zarurligini ta’kidlashmoqda. Hozircha ushbu muammo yuzasidan rasmiy tekshiruvlar davom etmoqda.
Izohlar
0