Superog‘ir vazn toifasidagi boks afsonasi Tayson Fyuri o‘z faoliyatidagi eng muhim g‘alabalardan biri va undan keyingi ruhiy holati haqida samimiy iqror bilan chiqdi. Bu haqda Zamin.uz xabar berdi.
Britaniyalik sportchi 2015 yilda 11 yil davomida mag‘lubiyat nimaligini bilmay kelgan Vladimir Klichkoni taslim etib, chempionlik kamarlarini qo‘lga kiritgan edi. Biroq, boks olamida kutilmagan shov-shuvga sabab bo‘lgan bu muvaffaqiyat sportchining shaxsiy hayotida kutilmagan burilish yasadi.
Fyurining ta’kidlashicha, bolalikdagi eng katta orzusi ushalganidan atigi bir necha daqiqa o‘tib, u o‘z hayoti ma’nosini yo‘qotganini his qilgan. Bu holat bokschini qariyb uch yil davom etgan og‘ir ruhiy tushkunlik girdobiga tortdi.
Sport olamidagi eng yuqori cho‘qqiga chiqqan paytda yuzaga kelgan bu bo‘shliq professional sportchilarning muvaffaqiyat ortidagi qiyinchiliklarini yaqqol namoyon etadi. Tayson Fyuri o‘zining bu kechinmalari orqali g‘alaba har doim ham insonni baxtli qilavermasligi hamda ruhiy salomatlik masalalari har qanday unvon va kamarlardan ustun turishi kerakligini ta’kidlab o‘tdi.
Izohlar
0