Saudiya Arabistoni 2034-yilgi futbol bo‘yicha jahon chempionatini o‘tkazishga tayyorgarlik ko‘rayotgan bir pallada jiddiy muammoga to‘qnash keldi. Bu haqda Zamin.uz xabar berdi.
Mamlakatning eng yirik sport loyihalaridan biri hisoblangan va kelgusidagi mundialning markaziy inshootlaridan biri bo‘lishi rejalashtirilgan Neom shahridagi stadion qurilishi vaqtincha to‘xtatildi. Mazkur loyihaning qiymati 2,5 milliard dollarga baholangan edi.
Ushbu qaror qirollikning o‘z hududida birinchi marta 48 ta jamoa ishtirokida o‘tadigan yirik turnirga tayyorgarlik infratuzilmasi bilan bog‘liq rejalarga sezilarli ta’sir ko‘rsatishi kutilmoqda. Hozircha qurilish ishlarining to‘xtatilishiga aniq nima sabab bo‘lgani va loyiha qachon qayta tiklanishi haqida rasmiy ma’lumot berilmagan.
Shunga qaramay, mazkur holat jahon chempionati uchun mo‘ljallangan ob’ektlar qurilishidagi sur’at va rejalashtirish masalalarini qayta ko‘rib chiqishni taqozo etmoqda. Saudiya Arabistoni hukumati musobaqani yuqori darajada tashkil etishni maqsad qilgan va bu loyihalar mazkur strategiyaning muhim qismi hisoblanadi.
Izohlar
0