Fransiyaning "Monako" futbol klubi jahon chempioni Pol Pogbaning jamoani tark etganini rasman e’lon qildi. Bu haqda Euro-football.ru xabar berdi.
Bu haqda klub matbuot xizmati ma’lum qildi. Tomonlar o‘zaro kelishuvga ko‘ra amaldagi shartnomani muddatidan avval bekor qilishga qaror qilishgan.
Eslatib o‘tamiz, futbolchi va klub o‘rtasidagi bitim 2027-yilning 30-iyuniga qadar mo‘ljallangan edi. Klub rahbariyati 2018-yilgi jahon chempioniga ko‘rsatgan ishonchi hamda "Monako" safida o‘tkazgan davri mobaynida namoyish etgan yuksak professionalligi uchun chuqur minnatdorlik bildirdi.
O‘z navbatida, Pol Pogba ham klubga bildirilgan ishonch uchun tashakkur izhor etib, jamoaning kelgusi faoliyatida ulkan muvaffaqiyatlar tiladi. Qayd etish joizki, 2024-yilning fevral oyida fransiyalik yarim himoyachi antidoping qoidalarini buzgani uchun to‘rt yilga futboldan chetlatilgan edi.
Keyinchalik sud mazkur diskvalifikatsiya muddatini bir yarim yilga qisqartirdi. "Monako" tarkibida harakat qilgan 33 yoshli futbolchi jamoa libosida bir yil davomida atigi oltita uchrashuvda maydonga tushishga muvaffaq bo‘ldi.
Hozircha tajribali futbolchining kelgusi faoliyati qaysi klubda davom etishi borasida aniq ma’lumotlar mavjud emas.
Izohlar
0