«Strasburg» klubi himoyachisi Gela Due faoliyatini Germaniya Bundesligasida davom ettirishi mumkin. Bu haqda Euro-football.ru xabar berdi.
Taniqli futbol jurnalisti Fabritsio Romanoning ijtimoiy tarmoqlardagi xabariga ko‘ra, 23 yoshli iqtidorli futbolchini o‘z safiga qo‘shib olishni maqsad qilgan Leverkuzenning «Bayer» klubi muzokaralarni muvaffaqiyatli yakunlagan. Tomonlar o‘rtasidagi kelishuvga ko‘ra, transfer summasi bonuslar bilan birgalikda 37,5 million yevroni tashkil etadi.
Ayni damda barcha rasmiyatchiliklar yakunlanib, futbolchining yangi jamoasiga o‘tishi kutilmoqda. Ma’lumot uchun, Gela Due «PSJ» yarim himoyachisi Dezire Duening akasi hisoblanadi.
U «Strasburg» sharafini 2024-yildan buyon himoya qilib kelmoqda. O‘tgan mavsumda himoyachi Fransiya chempionati doirasida 34 ta uchrashuvda maydonga tushib, 2 ta gol urishga va 7 ta golli uzatmani amalga oshirishga erishgan.
Yosh himoyachining muvaffaqiyatli o‘yini Yevropaning yetakchi klublari e’tiborini tortdi va natijada u faoliyatidagi yangi bosqichga qadam qo‘ymoqda. «Bayer» tarkibidagi raqobat va yuqori saviyadagi o‘yinlar futbolchining o‘sishiga xizmat qilishi kutilmoqda.
Izohlar
0